Piktori Miftar Memeti përfundoi portretin gjigant të Nënë Terezës - Aktuale.dk

Piktori tetovar Miftar Memeti përfundoi sot njëqind portretet e Nënë Terezës, pas 4 muaj pune të gjatë. 100 portretet e Nënë Terezës formojnë një portret gjigant të saj, i cili do të prezantohet më 6 Gusht në Galerinë e Arteve në Tetovë. “T’ua them të drejtën asnjë punë nuk punohet qind për qind por është e suksesshme. Ka dalë ajo që unë e kam planifikuar më herët. Unë jam i mendimit se ky lloj portret i madh i punuar nga 100 portrete është një risi për mua. Une nuk e di nëse në botë ka ndodhur, s’ka ç’ka s’ka ndodhur, por megjithatë për rrethinën tonë për mua është një version i ri i portretizimit të Nënë Terezës”, deklaroi Miftar Memeti, piktor.
Ndërkaq, një tjetër portret i Nënë Terezës do të formohet edhe me ftesat e vizitorëve që do të vijnë në Galerinë e Arteve.
“Vendosa të bëj një ekspozitë të llojit të performacës, ku publiku me ardhjen e tyre do ta krijojë mozaikun e Nënë Terezës, kështu që unë u dashtë të pikturoj njëqind portrete që do fotografohen dhe shpërndahen publikut përmes ftesave”, theksoi Memeti.
Projekti në fjalë do të ekspozohet në përvjetorin e lindjes së Nënë Terezës, në Galerinë e Arteve në Tetovë, dhe më pas do të prezantohet edhe në kryeqendrat e tjera shqiptare, Tiranë, Prishtinë dhe Shkup.
Burim info: tv alsatM