Botuesit të gatshëm t’i dhurojnë tekstet e unifikuara - Aktuale.dk

SHKUP, 20 TETOR - Botuesit shqiptarë mbështesin idenë e unifikimit të teksteve shkollore, madje ata janë të gatshëm që ti botojnë falas ato tekste, nëse lejohet përdorimi i tyre në Maqedoni. Kryetari i shoqatës së botuesve shqiptarë në Maqedoni, Muhamed Murtezi, e mbështet idenë për unifikimin e teksteve shkollore, por thotë se është shumë vështirë që të realizohet pasi që për tu botuar këto tekste duhet edhe mbështetja dhe përkrahja institucionale.

“Ne e përkrahim këtë ide dhe mendojmë se është pozitive por që të realizohet ne kemi nevojë edhe për mbështetje institucionale sepse po t’i botojmë ne ato dhe mos t’i pranon Ministria e arsimit ato libra do të ngelin kot”, tha Murtezi. Sa i përket botimi, Murtezu tha se nuk përjashtohet mundësia që ato të botohen falas.

“Është herët që të bisedohet çështja e botimit pasi që ende nuk kemi leje nga Qeveria dhe nga MASH-i për botimin e këtyre teksteve të unifikuara”, theksoi Murtezi. Gjithashtu edhe anëtari i kësaj shoqate Adnan Ismaili tha se kjo ide është e kamotshme dhe do të ishte një arritje e madhe po qe se realizohet. “Prej viteve të nëntëdhjeta kemi paraqitur këtë ide për unifikim të disa teksteve shkollore, gjë e cila është shumë vështirë për tu realizuar pasi që duhet pajtimi i tre shteteve siç është Kosova, Shqipëria dhe Maqedonia. Së pari duhet të arrihet marrëveshje në mes shqiptarëve e më pas të kërkohet nga Maqedonia që të pranohet kjo ide dhe të realizohet si e tillë”, tha Ismaili. Murtezi shtoi se së pari duhet që të pastrohen nga gabimet librat të cilat tani janë në përdorim e pasi që të eliminohen gabimet do të shqyrtohet sërish mundësia e unifikimit.

“Së pari duhet të rregullohen këto libra të cilët janë prezent tani dhe pasi që të eliminohen gabimet e konstatuara do të shqyrtohet edhe njëherë çështja e unifikimit të teksteve shkollore”, tha Murtezi. Sipas tij ato libra të cilët mund të përdorën në tre shtetet e lartpërmendura janë: abetarja, libri i gjuhës shqipe, historia dhe gjeografia.