Shqipëria prezantohet denjësisht në Festivalin tradicional Gala të Kuzhinave Kombëtare në Kopenhagen - Aktuale.dk

Nën patronazhin e Lartësisë së Tij, bashkëshortit të Mbretëreshës së Danimarkës, Princit Henri, Konfederata Kulturore e Shoqatave të të Huajve në Danimarkë dhe Bashkia e Kopenhagenit, organizuan të premten, më 21 tetor, 2011 Festivalin tradicional Gala të Kuzhinave Kombëtare. Në këtë aktivitet, synimi i të cilit është forcimi i frymës së mirëkuptimit, miqësisë dhe respektit mes popujve, ftohen të marrin pjesë përfaqësitë diplomatike të akredituara në kryeqytetin danez për të paraqitur në stenda-tryeza të posaçme, gatime dhe pije tradicionale të vendeve nga të pesë kontinentet.

Veç anëtarëve të trupit diplomatik, një numër jashtëzakonisht i madh miqsh dhe të ftuarish nga familja dhe oborri mbretëror, institucionet daneze të nivelit qendror dhe lokal, biznesmenë dhe përfaqësues të shoqërisë civile, patën rastin të mblidhen së bashku në Hollin Qendror të ndërtesës madhështore të Bashkisë së Kopenhagenit dhe të provojnë nën tingujt e muzikës dhe pjesëve artistike të interpretuara nga artistë të ardhur nga e gjithë bota, shijen e tryezave të vendeve të ndryshme.

Ambasada e Shqipërisë në Mbretërinë e Danimarkës dhe miqtë shqiptarë që ndihmuan në përgatitjen e një tryeze veçanërisht estetike, ofruan me këtë rast bashkë me mikpritjen e mirënjohur shqiptare edhe shijet cilësore të gatimeve dhe pijeve që përfshinin gjithë trevat shqiptare. Ajo transmetoi përmes kulturës dhe traditës specifike të gatimit, shpirtin e pasur të shqiptarit dhe karakterin e tij kombëtar. Përmes paraqitjes së gatimeve radicionale të Shqipërisë së mesme të shoqëruara me pijen tradicionale ”birra Korca”, me verë jashtëzakonisht cilësore të Rahovecit e me tortën ne formen e flamurit kombëtar shqiptar ajo mori vlerësimet më të mira nga të gjithë vizitorët.

Përfaqësimi dinjitoz i traditës dhe kulturës shqiptare në këtë Festival Gala nuk do të mund të realizohej pa kontributin bujar të Presidentit të "Birra Korcës”, Irfan Hysenbelliu, atë të biznesmenit Dhimitër Zaka, pronar i lokalit ”Skampa” në Kopenhagen dhe të biznesmenit Shkëlzen Murati, importues në Danimarkë i verërave të Rahovecit. Ambasadori i Shqipërisë në Kopenhagen, Arben Cici, gjen rastin t’i falenderojë dhe në emër të Ambasadës të shprehë konsideratat për gatishmërinë bujare që ata treguan për të marrë pjesë në këtë aktivitet të rëndësishëm.