Shqipëria dhe Kosova me një Abetare - Aktuale.dk

Bashkëpunimi në mes të Kosovës dhe Shqipërisë do të intensifikohet në të gjitha fushat e arsimit, ndërsa në vitin e ardhshëm shkollor, në të dyja shtetet, do të qarkullojnë tekste të përbashkëta shkollore, përfshi edhe abetaren. Kështu u bë e ditur sot në një konferencë për media nga ministri i Arsimit të Kosovës, Ramë Buja dhe homologu i tij nga Shqipëria, Myqerem Tafaj. “Abetarja si libër i parë i nismës shkollore, nuk cenon askënd, as kulturë, as traditë, as etnoset, por ndihmon të gjithë ata që janë në tërë gjeografinë shqiptare kudo që janë, për të pasur mësimin e përbashkët. Ky realizim besoj që do të jetë duke pasur parasysh edhe këto komisionet që përmenda, komisionet vlerësuese të cilësisë së abetares dhe botimet e përbashkët dhe jam shumë i bindur duke mos caktuar data, por shtatori i vitit të ardhëm nxënësit do t’i gjejë me Abetaren e re në të gjithë hapësirat gjeografike shqiptare”, tha Ramë Buja, Ministër i Arsimit të Kosovës. Ndërkaq Ministri e Arsimit të Shqipërisë, Myqerem Tafaj tha se ky është takimi i katërt në nivel ministrash që po realizohen, e që sipas tij, janë të domosdoshme për t’u koordinuar për të gjitha reformat dhe ndryshimet që po ndodhin në sistemin arsimor të Republikës së Kosovës dhe atë të Shqipërisë. “Sot mund të themi arsimi është në fazën e zhvillimit të tij më të vrullshëm, si në Kosovë ashtu edhe në Shqipëri, çka do të thotë që shqiptarët shfrytëzuan hapësirën e pafund të një shoqërie të lirë dhe demokratike dhe po tregojnë se investojnë me përparësi në shkollimin e fëmijëve të tyre. Në krahasim me kombet e tjera mund të themi që shqiptarët shquhen për investimin që po bëjnë shkollimin e fëmijëve të tyre”, tha Myqerem Tafaj, Ministër i Arsimit i Shqipërisë. Pas marrëveshjes së nënshkruar mes dy ministrive të arsimit, është ngritur një grup pune që po punon për unifikimin e programeve mësimore mes dy vendeve. Sipas marrëveshjes, ky proces nis me Abetaren dhe do të vazhdojë më tej me të gjitha tekstet shkollore.

Burim info: TVAlsatM