Ambasada e Shqipërisë përfaqësohet denjësisht në panairin e Turizmit - Aktuale.dk

Ambasada e Republikës së Shqipërisë në Kopenhagë përfaqësoi denjësisht turizmin dhe traditën shqiptare në Panairin ndërkombëtar të turizmit dhe udhëtimit "Ferie & Fritid" në Bella Center, Kopenhagë në datat 20-22 janar 2012.

Në stendën e saj, ALBANIEN, Ambasada prezantoi pamje, fotografi, video, muzikë, materiale informuese dhe pije tradicionale të Shqipërisë dhe të trevave shqiptare. Ajo prezantoi përpara publikut danez dhe vizitorëve të shumtë të panairit, në mënyrë dinjitoze, profesionale dhe kombëtare bukuritë natyrore të Shqipërisë, potencialet e saj turistike, trashëgiminë e pasur historike e kulturore dhe shpirtin bujar dhe mikëpritës të shqiptarit. Simboli i shqiponjës kuq e zi, shenjë e vitit jubilar të 100 vjetorit të Pavarësisë së Shqipërisë, ishte vendosur në të gjitha vendet e dukshme të stendës së Shqipërisë.

Interesimi i vizitorëve për të mësuar më shumë për Shqipërinë ishte i jashtëzakonshëm gjatë të tre ditëve dhe befasia e tyre ndaj videoklipeve dhe bukurive natyrore të paraqitura shprehej nga qëndrimi i gjatë përpara stendës shqiptare dhe numri i madh i pyetjeve që ata bënin.

Testimi i rakisë së Përmetit dhe verës së Rahovecit plotësonin jo vetëm sfondin e mikëpritjes së stendës së Ambasadës në këtë panair, por krijonin edhe rradhën e gjatë të vizitorëve që dëshironin të shijonin pijet tradicionale shqiptare.

Ky aktivitet hap siparin e aktiviteteve që Ambasada e Shqipërisë do të organizojë në kuadër të festimit të 100 vjetorit të Pavarësisë së Shqipërisë.